星期美點 WEEK 7(11/2 ~ 17/2)

• 六、日鼠咗入長洲避世, 我想對上一次去長洲都已經是三、四年前的事吧! 也許太耐無去過了, 很多橫街窄巷都唔係好記得點行, 差點迷路了!
  
  
  
• 長洲帶給我很多的回憶, 不只是第一次去離島的地方, 亦是去得最多的(不過都係兩次咁大把), 無論是好景渡假屋, 還是石油氣燒腸仔, 還有踢沙灘足球割傷的疤痕, 一切的回憶油然而生, 確實難以忘懷
• 大自然的環境確實十分美好, 無論是黃昏還是朝早, 一陣陣微弱的海風吹來令人心曠神怡, 太耐太耐無吸過一口清新的空氣了, 城市人
  
• 流浪貓、狗的數目比從前多了許多, 尤其是在垃圾站前之三五成羣, 我見猶憐, 難道連長洲都有那麼多不負責任之人?
• 食宵夜的車仔檔佈滿在碼頭一旁, 很久很久沒有見過的情景了, 無論是煎釀三寶、碗仔翅還是點心拼盤都是我的至愛
• 渣打馬拉松真的有很多人參與, 當中有多少人是可以qualify去跑呢? 這次的事可以當作一個教訓吧! 凡事皆以量力而為, 至少這就是我現在的工作態度
  
• 睇了《touch》, 我沒有看過漫畫, 不知道有十七本之多, 可以濃縮為不足兩小時之電影, 內容刪減在所難免, 一般的人難免以為這是一齣愛情片, 我卻以一套運動片觀之。 大家的重點可能會在南南愛達也定和也(假設無睇過漫畫的話), 我卻以須見工新田0.800的擊率, 達也練都唔使練都能投出變化球等棒球哲學為之一振, 皆因這都是現實中不可能出現之事, 無論如何, 在香港可以看到一套勵志的棒球片, 都已是一件不容易的事, 真的要謝謝安達充同長澤的人氣, 儘管片尾完全是馬虎了事, 草草收場
• 須見工? 係咪暗示我真係要快啲見工去?
  
• 棒球這種運動, 的而且確是適合東方人發展, 日本和台灣在奧運也有着一段耀煌的歷史, 在香港, 不要說甚麼職業聯賽, 就連一個正規的棒球場也沒有, 我們的政府...... 想報考棒球球證的course, 又因報名人數不足而無開班, 我們的政府...... 究竟在做甚麼?
  
• 有一天, 走咗去高登買ms duo pro, 走了一轉見到centralfield標了某Sa字頭牌子512MB一個全場最平的價錢($X55), 既驚喜又詑異, 猶豫了一陣, 並上前叫sales(我企咗響度睇咗成分鐘, 條友仔就一路同佢身前的一個friend玩, 完全沒有招呼我的意思)取了一塊, 直至他掃barcode出了價錢時, 他道出$Y55(X+1=Y, 即多了整整$100)...... 我立即指着價錢牌問他不是$X55嗎? 他竟然答我唔係, 來貨價都唔只啦! 頓時火冒三尺, 放下那$Y55的ms便走了, 我才懶得去理你甚麼來貨價, who fuxking cares? 我在乎的只是為甚麼自身身邊的是一位阿叔而不是劉華? 連最簡單的貨真價實也辦不到, 就算你租多幾間舖我都唔會幫襯你, 況且, $Y55的價錢夠我去買原裝Sony同型號有找, 高登最大聯店, 又如何? 就算其他所有舖頭執哂都費鬼事益你
• 一個最頹廢的Valentine's Day, 就在石磢尾的一間茶餐廳誕生, 連最後想試一試一小塊令我生畏的牛脷, 都被阿姐收埋, 大煞風景, 食番件油多補數
  
• 最近公司部腦轉咗新wallpaper, 就即刻死咗個server, 成個operating system無咗, 最弊原來之前一直無人負責backup, 公司所有data無哂, 都唔明白點解公司管理係咁兒戲? 廿一世紀都發生咁嘅事我都好慶幸自己有機會目睹整個過程, 與有榮焉! 不斷擴張版圖的同時, 是否更應確保總部的危機管理是否足夠呢?
• 出事時用的wallpaper
  

《聽陳蕾士的琴箏》明年絕響, 難倒會考生 黃國彬致歉

2006年2月6日

【明報專訊】90年代至今的中學會考生，相信都「領教」過中文科《聽陳蕾士的琴箏》一文。作者把琴音化成文字，將曲譜變成詩畫，化聽覺為視覺。琴音是銀 暈，又是香氣﹔是朝霞，又是萬籟。天馬行空的文句10多年來把16、17歲的會考生弄至頭暈目眩。這首新詩於明年會考起成「絕響」，作者黃國彬笑說要為曾 「苦讀」這首詩的學生說聲「對不起」。明報記者 姚國雄

明年中文會考取消範文

新詩《聽陳蕾士的琴箏》，學生說難之餘，連作者黃國彬也承認這首詩「複雜了少少」。這首新詩納入為中文會考科課程範圍後，每年均有不少學生表示對這首詩摸 不頭腦。黃國彬同意這首詩的確難，並表示，「嘗過他的苦頭」的學生出席他主持的公開演講時，問到關於這首詩的內容，他便會向他們笑說﹕「我先向你們道 歉，對不起，要你們考試考得那麼辛苦。」聽罷，學生也笑了。

簡單和艱深是相對的，黃國彬也明白這個道理。《聽陳蕾士的琴箏》在《新詩三首》中「最後出場」，前兩首是聞一多的《也許》和徐志摩的《再別康橋》，他笑說，前兩首詩的內容較為簡單，學生再讀他那一首，會感到特別困難。他續說，「艱深」其實也有好處，因為可以方便出試題。

新詩多比喻 學生難掌握

到底這首新詩難在哪裡﹖黃國彬說﹕「難在意象。」他解釋，新詩意象和學生自小已接觸的古詩意像有別，古詩多用白描，少用比喻，意象較易掌握。但新詩卻多用比喻，意象難以捉摸，加上這首詩所比喻的是古箏琴音，詩中更連用多個比喻，故很多學生會「百思不得其解」。

他又說，學生自小學習古詩，對新詩較為陌生，連教師在新詩方面的訓練也不多，所以在學習新詩時，學生未必能掌握到箇中的技巧。但是，這位寫琴音的高手仍然堅持，他這首新詩是值得讓中四的學生學習。

堅持值得中四生學習

新中國語文會考課程將於明年開始「兩卷變五卷」，並加入校本評核，26課範文亦會取消。現為嶺南大學翻譯系教授的黃國彬表示，雖然不知道新舊考試模式哪種會比較好，但學生熟讀考評局定下的範文，可讓他們熟習不少寫作技巧，紮實語文根基。

星期美點 WEEK 6(4/2 ~ 10/2)

• 經歷完打籃球的傷痛, 翌日早上還要再返工, 除了腳趾公割損了之外, 小腿, 大腿同臀部因太耐無做過劇烈運動而出現痲痹, 上下樓梯都慘過要死, 兩小時的跑動對我而言果然太多了
• 更慘的是公司春茗而遷就腳傷而踢拖出席, 仲要去到沙田畫舫咁遠, 十幾度又大風, 寒風刺骨, 好在頂得住, 反而今年其他同事都唔係點盛裝出席, 怪哉怪哉!!
• 紅酒真的好難飲, 一杯都嫌多, 啤酒就啱feel好過, 飲多幾杯都無問題, 不過啲嘢食就好一般, 除了唔飽之外, 食落仲要無乜味, 無怪乎我最後一輪可以食咗一碗糯米飯同兩碗干燒伊麵, 之後都唔係好飽, 成$4xxx一圍真係唔多值
• 臨走時我老頂仲醒咗過豬頭過我, 認真客氣, 睇佢個樣唔似係整蠱我, 無其他喻意掛!
• 成個禮拜返工隻腳都痛到嗌救命, 看來要多做一點運動了
• 街上所見, 多了很多人在慢跑, 彷彿是為了渣打馬拉松而做準備, 看來我都要為下星期二的情人節充份準備一下
• 其實丹麥佬都幾無品, 一來又唔覆email找數, 一時又畫漫畫搞人地宗教, 係樹大有枯枝定唔濺攞嚟濺呢?
• 習慣了看球證偏袒祖雲達斯的新聞, 當我看見這莫須有的三分時, 大可一笑置之了
  
  
• 買了燕姿第一次演唱會的DVD, 我真係十分佩服華納(香港)的呃錢技倆, 一隻連VCD質數都不如的垃圾DVD, 竟可掛羊頭, 賣狗肉賣$138, 我想燕姿可以好好地考慮一下自己的方向了, 華納所作的一切實在令人不屑, VCD版的質數肯定更加難以想像, 更嘔心
  見鬼DVD畫面
  
• 真係唔多明白自由行的心情! 國家是如何教育你們啊, 迪士尼不是甚麽樂園, 也不用那麼衝動氣憤吧! 滾回你的老家吧! 別以為自己有甚麼了不起啊!
  

星期美點 WEEK 5(28/1 ~ 3/2)

• 恭喜發財, 祝願各好友身體健康, 心想事成, 恭喜恭喜!! 各位老細今年揾多啲, 一於愛情事業兩得意!
  


• 年廿八的公司收爐飯感覺上更似是一餐早茶, 一籠籠的蝦餃呀, 燒賣呀, 牛柏葉呀, 山竹牛肉呀, 鳳爪排骨.... 仲要坐正老闆嗰圍面對面嗰隻, 食慾頓時減半, 陰公!
  
• 農曆新年又到, 對我的意義係多咗幾日假期, 可以抱頭大睡, 可以打機打餐飽, 可以上網上天光......惟獨就是不可以逛街, 十間舖有八九間都唔開, 真係行咗都無乜意思
• 年廿九又去咗Cyberport睇戲, 占爺的《賊壇新人王》, 都是一貫占式搞笑formula, 或許真的有一段時間沒有睇過占爺的演出了, 雖然只是舊酒新瓶的製作, 對我而言卻十分受落, 失業真的十分可怕, 沒有親身經歷過是無法體會箇中的辛酸的, 我想整套戲要帶出的就是這一點吧! 見高拜, 見低踩這種世態炎涼, 又何嘗不是司空見慣呢?
• 最搞笑係夢想升職時占爺搭lift上頂樓時唱I believe I can fly同最後占爺老友答佢係Enron做呢兩幕, 睇完之後一搭lift諗返起都有種很有共鳴很想唱的感覺, 後者應該是對當accounting工作的每一個人更有深層意義
  
• 終於又有人工加了, 做咗足足一年就加了兩次人工, 老細都認真俾面, 雖然加薪幅度只有上次一半, 但都算係幾有諴意喇, 不過, 學董董話齋, 離開十分容易, 留低就需要十分大的勇氣
• 年初一無去拜年, 亦無人來拜年, 耳根清靜, 可以瞓餐飽, 又係下晝至醒嗰隻, 上下網八下咁又一日喇, 時間過得真快
  
• 初二承接初一低位繼續夜瞓低開, 新蒸頭仲屎忽痕睇一公升的眼淚#8同#9, 有兩個催淚位真係感動到有少少想喊, 肯定勁過世貿老警的催淚彈, 如果喊埋出嚟就真係好玩, 新年流流流馬尿, 老媽子肯定殺咗我都似
• 初三老早就要起身準備游乾水, 以為冼仔有mood去馬, 點知又一次倒錢落海, 講返四方城都係無乜斬獲, 半日打得嗰五圈, 細伯伯母陣再加一對石獅子果然猛料, 輸少當贏, 輸少當贏!
• 初六晚約咗一大羣中學同學去石硤尾打籃球, 計計下都有四年幾五年無掂過籃球, 慘敗乃是意料之內, 莫講話以前上身的三分本領, 球感之差直情連拍波都甩手甩腳, 進攻不成, 惟有全力防守, 搶下籃板, 偷下波, 做下助攻, 蓋下火鍋, 都仲有兩手
• 打全場頂足兩粒鐘真係散哂, 跑來跑去來回兩邊走, 打完停低嗰下真攞命, 跑到連對襪磨損腳趾公都唔知, 唔認老都唔得

星期美點 WEEK 4(21/1 ~ 27/1)

• 有點懷念返學的生活, 日日準時放工返屋企都唔知做乜嘢好, 個人好頹廢
• 14%主要組件有裂痕, 田少你呢個玩笑未免開得太大了吧?! 新年又到, 出門要早, 唔係無車搭
• 估唔到有過萬名教師參加遊行, 我都好佩服羅太仲有咁大勇氣同面子坐呢個位, 其實講嘢有時唔使咁刻薄呀, 羅太係咪唔記得自己仔女都不在香港接受教育呢? 倒自己米都唔好咁大聲啦, 用下腦啦!!
  
  
• "平淡既生活已經係一種幸福, 在慨嘆自己不幸的同時, 想想自己身上的幸運, 嘗試珍惜慶幸自己擁有既一切"--這是上網見到有人睇完《一公升的眼淚》之讀後感, 十分同意
• 星期六同MAY MAY一齊去了睇孫燕姿演唱會, 完全無估計過YZ會唱live會咁得, 快歌一口氣唱三首仲要完全啱位入, 慢歌可以收放自如, 儘管我不懷疑過她的才華, 但如非親眼所見, 實在難以置信, $200飛都可以咁有feel, 我下次一定會買$400飛
• 我睇的一場嘉賓有Tanya, 林一峰同劉華, 應該及絕對比第一場的嘉賓楊千嬅同長頸鹿好, 不過無得聽同比較一下阿千嬅同海皮嘅唱功同YZ差幾遠係唯一撼事, 仲有係少咗一個廁所位
  
  
  
  
• 燕姿說得很對, 有時間真的要去一去旅行, 香港實在是太細了, 有機會出去見識一下擴闊自己的視野, 就會覺得自己是如何渺少, 任何不開心的事都會拋諸腦後, 一瞬間就完全忘記了
• 另一金句 : 我們不應去接受命運,而是去選擇它
• 十一點幾散場, 比想像中早了一點, 但卻有喜出望外的精彩, 絕無半點冷場, 不愧為我最喜愛的孫燕姿
• 希望下次燕姿可以唱更多我喜愛的慢歌, 例如任性, 相信, 愛情證書......太多太多, 不能盡錄
• 謝謝燕姿, 妳帶給了我無限的榮耀, 肯定自我的眼光, 相信自己的直覺, 由一個寂寂無名的小女孩, 昇華到街知巷聞的小天后, 讓我更肯去相信自己的幸福, 我要的幸福, 在不遠處
• IFPI 將 向 每 人 索 償 $2340022 侵 權 網 民 資 料, 你唔好去搶? 一隻歌唔見一千萬? 在香港有邊位天王天后有咁嘅叫座力呀? 篤數都唔好篤到咁盡呀, 俾啲common sense好喎, 好心你地真係做返好啲音樂先好出聲啦, 成日都話會做好音樂, 得個講字, 又無實際行動, 知唔知個醜字點寫?
• 睇咗一套幾偏門的電影--《遇人不熟》, 幾得意, 可以以戲中每一位角色用第一身人身拍成, 一切所發生的事看起來就是那麼巧合, 同一個場景用了不同的角度去完成, 實為其精彩之處, 不過可惜結局有點草草收場, 有點馬馬虎虎的感覺, 而且整套戲比我想像中短, 否則肯定更加完美
• 是我太自負還是太強人所難? 也許我要更懂得去珍惜其他人的感受, 一公升的眼淚對我而言絕對太多
  
• 介紹一個幾有用的firefox extension :del.icio.us可以bookmark哂自己的favourite websites係上面, 一log in自己個account就可以用, 變相成為了即時書籤, 同埋可以睇下有幾多個人同你一樣咁有taste一齊bookmark咗呢個site, 啱哂我呢啲公司, desktop同notebook computer三邊走的人
  

星期美點 WEEK 3(14/1 ~ 20/1)

• 十三號先夜機返香港, 第二朝早仲要趕返工, 好無奈, 勁無say
• 離開四日, 原來都唔算有好多email要睇, 得三十幾封啫, 唔使一日就睇得哂, 太好了!!
• 終於又要面對返日日對住老闆的生活, 又要小心做嘢, 唔係又俾佢剷, 其實佢咁火爆, 唔驚爆血管架?
  
• 十六號是MAY MAY生日, 一切準備得相當妥當, 尤其是那張生日咭相當有意義, 非常滿意!! 是晚晚上則到了Langham Place內的一家泰國餐廳內食dinner, 比想像中好食, 食得好飽, 太perfect了(p.s. 炭燒牛肉好好味, 値得一試再試, lunch食會抵好多)
  泡芙同大菜糕, 很細粒, 一口一粒
  
  另外兩份大禮包括:
  
  
  
• 九鐵真係好雞, 咁多零件有裂痕, 點叫人去搭呀? 宜家仲要轉用人手操作添, 實在係廿一世紀的悲哀
• 《Gallop racer 8》進展不俗, 已經有得用Deep impact, 不過後上馬真的很難用, 成日追唔到前面, 好蝦人玩, 下個目標會係用T.M. Opera
• 強烈建議Tecmo下集加入風向系統, 迎合某本地名駒之輸馬藉口, 亦可考慮加入病毒感染, 長掛免戰牌避戰
• 今集進步了不少, 尤其是可以cancel之前報了名的賽事, 只用一隻馬亦可避免一次過太多好馬用而唔知點部署好, 真係值得買日版嘅
• 其實我覺得呢隻嘢真係有少少over-rated, silent witness:仲要有四個special ability, 有無搞錯? 仲勁過我隻巨人長堤, 玩嘢呀!!
• Upgrade了自己notebook的firefox, 由0.9.1升到去最新的1.5, 感覺上連線速度好似快咗好多, 不過最弊係好多extension都用唔番, 要再download過, 好麻煩呀, 整咗半日終於搞掂
• 幾有氣勢, I like it!
  
• 用firefox的人, 我要多謝你, 因為你們都是識貨之人; 唔用firefox的人, 我更要多謝你, 因為你們幫了我頂住哂啲virus, spyware...萬二分謝意ORZ
• 有錢其實炒下油都唔錯, 油價日日係咁升, 好似仲未見底, 肯定有排炒
  

星期美點 WEEK 2(7/1 ~ 13/1)

• 終於都係買咗PUMA X DUPONT的羽絨, 減咗價都要$703, 仲貴過我啲珍貴波衫, 真係好不捨得個七百幾蚊呀!! 上完上海之後唔知仲有無機會著, 陰公!
  
• 除咗件羽絨外其實仲想買多件防寒內衣及褲, 奈何見到要成二百幾蚊件就即刻打退堂鼓, 完全不值
• 除了羽絨外的購物清單 : 鬚刨, 冷帽, 杯麵, 咖啡......前後加埋又使咗四位數, 無謂又無辜
  
• 星期二五點幾就要起身預備裝身, 五點九就落樓去搭機場巴士, 去到仲遲到走咗部巴士添, 好彩去到機場都仲未遲到
• 所有嘢都帶齊, 係漏咗一樣唔記得拎, 就係--手錶。連部無用嘅PHILIPS 968都有帶, 有無咁低B呀?
• 過唔到金屬探測器, 個肚唔知有乜鬼? 但係海關咁都俾我過關, 你唔驚我係拉登架?
  
• 第一次搭飛機就迷迷糊糊地睡了, 連飛機餐都無食, 毫無興奮可言, 嘥哂
• 浦東機場真的很大, 一望無際, 很難再有機會可以一次過見到幾十家航空公司的飛機, 大開眼界
• 搭的士由機場到公司都要成百四蚊人仔, 仲要係極速飛馳個隻, 很難想像坐磁懸浮列車可以七分鐘到達
• 第一日在宿舍洗澡就跳大掣停電, 有誰比我更黑仔? 好在都未冲身, 唔係一定變雪條
• 大陸啲交通規則真係好得, 基本上都唔使點睇交通燈, 睇單車, 電單車, 汽車就可以了
  
• 平淡得過份的正常生活 : 返工 > 食早餐 > lunch > 放工 > dinner > 歸家 > 洗澡 > 瞓覺, 救命, 殺咗我好過
• 走之前一日一早竟然落雨, 對鞋又唔生性浸濕哂, 對腳焗住唔乾又凍個下真係攞命, 之後食完dinner仲要成九點幾至返到宿舍, 對鞋都仲未乾, 慘情
• 最後一天先至係城皇廟買咗幾幅幾得意的書畫作手信, 平就真係幾平, 係要拎上飛機驚打爛個下嘢麻煩, 後來在機場禁區一間商店見到啲差唔多係一樣嘅畫, 再望一望個價錢, 我同個同事不禁陰陰咀偷笑...
• 有甚麼比冲涼停一次電更黑仔? 肯定係一晚過停三次電, 我想死, 臨走前一晚收到呢份大禮實在令人驚喜
  
• 登完機都成五點半, 出到跑道又用咗三四個字, 夜晚六點至飛得起, 反而這次坐大機就沒有去個時細機咁穩定, 不過機尾有cam映住響個mon睇到由停機坪至出跑道呢下又幾得意, 飛機餐比想像中難食, 返到香港都已經差不多八點了, 累透了! 好彩有個之前無預計會見到的超級大傻瓜分擔一下啲行李, 否則...哈哈, 真的意想不到的驚喜, 仲以為自己眼花睇錯添!