星期美點 WEEK 35(26/8 ~ 1/9)

• 無鬼聊地去睇《嚟多件衰鬼上帝》, 無乜特別期望之下, 都還過得去啦, 最慘係無咗上集主角占基利, 吸引力大打折扣, 挪亞方舟我覺得未免太過誇張造作, 除此以外都有其他賣點嘅, 例如啲小動物同Steve Carell的誇張動作表情啦, 整體來說都算交到功課
• 拖咗好耐之下終於買咗Onkyo L-S7GX, 本來諗住去幫襯超人的豐X, 結果只賣剩display, 立即打消念頭走去國美睇睇, 發現價錢一樣之餘還有新貨, 再問一問又送多年保養, 加埋有三年免費保用, 比另一款心儀的L-N3X只貴兩百蚊, 即時扑鎚入手, 扣埋cash dollars埋單$2849, 都幾貴, 不過真係千金難買心頭好, 揾到部全新MD HIFI仲有三年保用, 談何容易


• 飛的回家試完初步覺得啲聲真係真係清過之前部Denon D-G2MD, 尤其是個bass震撼得多, 感覺上好有層次, 質素係値得呢個價錢嘅
• 丟下多年的舊MD竟然仲play到, 估唔到可以咁襟用喎
  
• 用咗七年條毛巾開始洗到穿窿, 諗過買Espirit, 去過百貨公司睇, 最後還是買了MIJ的Superstar
• 想買那件德島球衣賣哂, 極度悔恨為何不早一點買, 好灰
  
• 公司無故停電兩小時, 無冷氣無燈但竟然電腦可以仲開得著, 但係太焗之下, 結果提早一小時食lunch, 另一個小時同同事一齊行奧海城, 都幾無聊下
• 意甲開鑼, 最好笑都係呢單卡坦尼亞教練被紅牌趕出場後仲要踼對手柏爾馬個教練一腳
  
• 好忙, 日日OT到七點幾, 就快支持不住
  

星期美點 WEEK 34(19/8 ~ 25/8)

• 好難先揾到的《Ratatouille》原版英文配音, 結果去咗BC睇, 覺得幾好睇喎, 隻老鼠夠哂抵死, 笑位又多, 果然無揀錯, PIXAR出品, 真係必屬佳品, 比起一般迪士尼卡通出色得多, 不過都係覺得《Cars》好睇啲, 因為Lightning Mcqueen型好多, Owen Wilson配音又正好多, 老鼠就感覺不到
• 之前睇中的Discman無optical out, 即係玩唔到MD啦, 可以放棄了, 有optical out的又要過四位數, 咁不如買過套HI-FI好過, 看來唯一的選擇就是Onkyo了
• 同女性做同事真的很煩, 表面上同你談天說地, 有講有笑, 轉過面可以在背後數你一百個缺點, 好在我無埋堆, 唔係真係死咗都唔知乜事, 做個愚人總比做好人好!
  
• 追多套日劇《考試之神》, 劇情其實幾老土下, 個細路為咗去間打棒球勁的高校而發憤讀書, 請咗個補習天后幫拖, 比無劇更無劇, 如果唔係得閒得滯我諗都未必會再追落去
• 死, 死啦!! 原來連298同328都撈亂哂, 唔怪得揾唔到部MD機啦, 真係好白痴呀!!
• 英文考試完成, 過程都尚算順利, 不過不太喜歡個考試方式, 三小時的考試, 中間有十五分鐘點你出去考Oral, 感覺幾奇怪下, 在你埋頭苦幹的緊張關頭, 突然要你停低去考第二啲嘢, 一如阿SIR所說, 是幾無奈的安排, 可幸的是剛好夠時間完成, 要合格應該無乜難度
• Oral期間得知個鬼佬阿SIR都識得我間公司係貴嘢, 又真係估唔到間公司個朵咁響喎!
  

星期美點 WEEK 33(12/8 ~ 18/8)

• 《變形金剛》真係幾得下, 故事唔算好出色, 勝在特技效果夠逼真, 啲機械人好似做到真的一様, 可見幾重本投資, 連我這個不好機械人的人都睇到目定口呆, 最尾一幕緊張到直頭連廁所都唔想去, 精彩!!
• 上映兩星期後早場都仲要揀到8:25先睇到, 《變形金剛》都算夠誇張, 8:25都未算最早, 8:20的阿森一族先勁, 要咁早起身睇真係幾慘, 不過有得扣cash dollar條氣又順返哂, 反正還有二百蚊cash dollar用不着
  
• 結果都係親自同FC講不會轉permanent, 想不到會受到支持添, 轉做audit看來是無可避免的選擇
• 有個dept快要面臨真空狀態, 三個人中無咗兩個, 一時間要找人接手這個燙手山芋又談何容易, 未知會否牽連在內呢? 希望唔好啦!
• C朗勁, 勁到做埋紅牌阿姑, 仲有乜嘢好講
  
• 猶豫了好久, Westone UM2正式入手, 在金聲試過了UM1, UM2同UE 5pro, 價錢平一倍的UM1明顯被比下去, 好似差一個level咁, 5pro就覺得人聲可以, 不過樂器聲有點矇, 唔夠清, 試來試去都係UM2啱自己用, 一來耳棉帶來不但舒服到你不願放下, 隔音勁到出街會被車車死都唔知, 二來勝在表現最平均, 人聲樂器聲都有層次感, 一如許多網友所道, 甚至連那一種樂器放在那個位置都感覺得到, 果然物有所值, 三百美金一個earphone已經如斯出色, 不知更昂貴的3210又會如何呢?
  
  
  
  
• 最近睇了的港台節目《想一想香港》, 值得推介, 有龍應台, 蔡東豪及陶傑等名人, 個人雖不喜陶傑, 但佢真係串的好應, 好睇!!
• 無聊下亂click的亂發現, 有時間可以一睇

星期美點 WEEK 32(5/8~ 11/8)

• 最後一天完成份paper, 加加埋埋前後整咗成三十四頁, 用咗只係兩個星期完成, 忽然覺得自己幾勁, 完成的一刻真的攰到想瞓低, 但係又覺得自己的努力沒有白費, 都幾滿足o架!!
• 交功課那天不知為何那麼多人, 結果等咗好耐都未交到去counter, 其實只係收收份功課吸過印咁簡單, 都唔知點解要成三四個字, 最後先至有staff approach嚟收, 咁嘅服務認真麻麻
• 交完功課又同黃小姐去咗PP Triple-Os食, 狠下心腸加四十蚊換咗士多啤梨同藍苺味奶昔, 我覺得除咗多了少少士多啤梨核同藍苺皮之外, 同M記啲奶昔真係無乜分別, 咁加廿蚊換vanilla味又會點呢? 好想再試多次, 應該係敗家多次
  
• 星期五下畫竟然掛到八號風球, 好似係做咁多年以來第一次打風有得早走, 兩點九就執好哂啲嘢走人, 一落到公司樓下連我把大遮都吹反(用咁耐以來都未試過), 三點鐘已經行到返屋企, 如果唔係就會好似下面咁
  
  
  

星期美點 WEEK 31(29/7 ~ 4/8)

• 國米3:2贏咗MU, 勁, 蘇亞素仲入咗兩球添, 誰說意甲水準在英超之下呢?
  
• 全個星期放工後一返到就不停地做research, 晚晚直踩到深夜四點半, 都只係緊緊完成資料搜集同初步分析一part, 做咗一半多少少, 餘下三天要完成結論同總結, 希望趕得起在deadline前完成
• 又走咗堂英文, 為咗趕起份research paper, 好似未試過同一個sem內走過兩堂, 勢估唔到去到拉士個sem先搞啲咁嘅嘢, 最慘係堂英文係小班教學, 得廿個人, 走堂實通哂天, 今次真係様衰衰囉!
  
• 收到通知知道自己可以選擇轉permanent或繼續temp下去, 我更prefer離開添, 好煩惱啊!!
• 又收到上個sem result, AFP exam竟然仲高分過assignement, 最開心係前後加埋考試只係温咗三日, 用了最小的input有咁嘅成績, 飲得杯落!
• 最細的細佬碌下碌下入埋城大讀CS, 真係令人開心嘅, 最開心莫過於阿媽, 四方八面地不停打電話去豬朋狗友報喜, 出到個大學生寶貝仔嘛, 得戚得佢呀!