星期美點 WEEK 3(15/1 ~ 21/1)

• 返工一星期 , 學到的東西不是太多 , 希望可以越做越好啦!
• 同事非常之nice , 關係密切得像一家人一樣 , 完全同響地鐵時是兩回事 , 反而有點不適應而感到陌生 , 但我會努力去融合去的。
• 一個無電腦用的Accounts Clerk , 感覺上像廢人一樣。
• 返學更加恐怖 , 科Management Accounting我上咗兩堂都唔知想佢做乜嘢 , 最慘就係個阿蛇教得好到加零一 , 完全係no excuse , 點算?
• Taxation 同想像中難度差唔多 , 但唔知點解比阿蛇點咗相 , 追住我嚟做scenario , 攪到想釣下魚都唔得添。
• 終於同老懵董claim返CEFo個一萬銀 , 一收到就身痕 , 好想買嘢
• 掙扎了一個星期 , 日版Viewtiful Joe 2盛惠$380 , 美版Viewtiful Joe 2連特典盛惠$230 , 結果都係遺反了一個日版忠實fans的責任 , 選擇了後者 , OMG!!
• 下星期仲要買Bio Hazard 4 , 不過我諗都唔會有時間玩
  

星期美點 WEEK 2(8/1 ~ 14/1)

• 今個星期有點冷,個人非常之懶,唔願起身,仍然attend到七個interview,抵讚!!
• 見工速度比預計中理想,最高紀錄係一日走三場
• 已經有offer了,人工不高,但希望可以學以致用,呃下工作經驗啦!
• 返學只是一星期,已充分感到level 3之壓力,真係唔講得少,要繼續努力
• 海狗你好嘢,咁多賣老翻嘅黑社會唔拉,你走去拉BT友,真係要送個「叻」字俾你,剩係識得聽電影佬老點。Come on,莫講話要我買飛入場,你連吸引我去click個mouse去download嘅氣力都無呀,陰公。反省下啦,垃圾。
• Roger又一次贏Roddick,已經忘記佢對上一次輸波係幾時,厲害!
• 一週總結:海狗令我添煩添亂
  

有無搞錯

當我在看line-up的時候,
我在想,有無搞錯,
安利同史坦踢翼?
"X"先生,真係想請教你點進攻呀?
點解仲唔試下用卡拉古尼斯或列高巴打正選?

當上半場完睇比數的時候,
0 ~ 1,
我在想,抵死,仲唔比我噏中,
睇下你仲換唔換人去追?

當2 nd half 39min的時候,
0 ~ 2,
我在想,玩完囉,破唔到球會紀錄添!
(雖然有少少失望,但係如果一場失利可以令"X"先生反省一下點去排陣,我覺得是值得的。)

當2 nd half 43min的時候,
1 ~ 2,
我在想,都好,唔使主場都捧蛋而回

當2 nd half 46min的時候,
2 ~ 2,
我在想,唔係呀,"X"先生的魔法又顯靈?咁都追和,有無搞錯?無天理呀!!

當2 nd half 49min的時候,
3 ~ 2,
我在想,......,老天爺真係識得開玩笑,踢七分鐘好波都贏得,國米即是國米,無話可說。

星期美點 WEEK 1(1/1 ~ 7/1)

• 新年新開始,希望最少一個禮拜update個blog一次。
• 新年願望:人人有工開,月月有薪加
• 又開始要返番學了,今期真係要加把勁至得,有我最討厭的taxation,OMG!
• 第一堂taxation就差o的悶到瞓著,真係嗌哂救命。
• 使咗兩舊水買咗個US Open背囊for返學用,比想像中平了,總好過買耐克同愛迪達吧!
• 書到用時方恨少,寫呢篇週記已經發覺好多中文字唔知點寫。
• 迪文泰娃贏咗大威,很好很好
• 國米已經在正式比賽中連續28場不敗(13勝15平),追平球會紀錄,且看"X"先生能否打破這個紀錄?

好波不妨一睇再睇

04回憶錄

(二)讀書篇

今年都算係豐收的一年,成績都見得下人。

HKU SPACE(Advanced Diploma in Accounting):

• Statistics---開頭都幾擔心呢科,幸好自己o的數底唔差,pick up得好快。Kent Sir係唔錯嘅tutor,不過有時教得好慢,響o的好簡單嘅數上嘥咗好多時間,搞到後面o的topic趕得好辛苦。功課好容易,第一次拎一百分。
• RESULT:B+(考試唔知發乜神經竟然計錯哂o的mean,median同mode,如果唔係咪A-囉,少許失望><)

• Legal Framework of Business---呢科真係好鬼悶,再加上黃Sir把聲好沉,搞到上堂時成日釣魚。幾欣賞黃Sir堅持用英文上堂,雖然你o的pronunciation怪怪吔。功課嘅input同output完全不成正比。枉我放工仲走去圖書館揾資料,哪知卻事倍功半。
• RESULT:B-(有生以來首次大發神經寫滿十二版紙,仍然記得在交卷後右手不停地震,雖然仍有一題無時間答,但那三小時的考試不停書寫肯定畢生難忘。)

• Managemnet Information Systems-- -電腦尚算是小弟的強項,所以呢一o的都唔擔心呢科。Paul Sir真係好人得過分,竟然話連串法差唔多都會俾分,仲要出埋份精讀俾你,焉有不合格之可能?功課也是十分容易,得閒上google search下已經搵到八九成資料,加番個conclusion就可以收工。
• RESULT:A(太感動了,第一次考試可以覆完兩次卷後仲可以早走成半粒鐘。真係好多謝Paul Sir,無你份精讀我肯定無咁好成績。)

• Intermediate Accounting I-- -當我去攞書見到本書時,我呆Q咗,本o野似字典多過似書囉。一千三百多頁,點讀呀?Helena真係好犀利,可以用十堂時間教哂十四個topic。呢科 真係好攞命,個個topic都要讀咁濟,無得偷懶。功課亦比之前惡搞,好多accounting entries都唔識做,分數好低。
• RESULT:B-(完全係自己懶,連notes都溫唔哂。考試好多條數都唔識做,真係有擔心過要re-take。拆完封信收到個result後,第一個感覺係要劏雞還神,完全喜出望外。多謝Helena,無妳o的貼士我一肥硬。)

• Intermediate Accounting II-- -為了追隨Helena,專登take咗響北角上堂。經過Intermediate Accounting I的洗禮,感覺上呢科輕鬆好多,work load只係其一半而已。因此,差唔多堂堂都可以早走(Helena教書速度接近光速,有次竟然可以早走成個幾鐘,相比起隔離班張Sir堂堂over-run,Helena控制個timing真係好好多,唔怪得妳咁鬼死搶手啦,又HKU,又BU,又OU,真係抵你發嘅),差o的想要求Helena refund番部分學費,哈哈!!功課就比Intermediate Accounting I難少許,mid-term test亦唔小心失分,惟有寄望考試可以高分o的拉番高個overall result。
• RESULT:要等多一個月至知(Helena今次俾貼士無Intermediate Accounting I o個時咁直,相對地份卷亦無咁難。除咗條Dilutive EPS計咗我成粒鐘煩o的之外,都總算做得哂份卷,有個B仔我就心滿意足囉。

• Quantitative Methods---其實呢科一開頭根本唔知係讀乜嘅,由於prerequisite係statistics,感覺上係statistics嘅 加強版。阿Sir真係好搞鬼,由頭到尾都無介紹過自己係乜水,只係肯佢響HKU辦公,有咩唔識就打電話俾佢。我諗宜家都幾難揾到o的先生好似佢咁用鉛筆改 卷同影印手寫嘅answer。Mid-term test派卷時,又無端端叫咗十二個同學仔出去,我係其中之一,話有o的o野同我吔講。當時幾鬼擔心自已成績差俾佢省(個test我只係溫咗一日),出到 去先至懶神秘咁話呢十 二位同學係top twelve,當時嘅感覺就好似由地獄上番去天堂一樣,真係膽汁少o的都俾佢嚇死。其實呢科真係幾interesting,如果個assumption make得好,decision making會準好多。我幾鐘意呢一科,不過有時上堂都試過悶到釣魚。
• RESULT:又 係要等多一個月至知(阿Sir今次exam出得好straight forward,有幾條直頭照dub 份mid-term test咁,唔知係咪佢知道我吔考完Intermediate Accounting II之後隔一日就考佢呢科特登醒我吔。SPACE今次個exam timetable真係set 得好差,大佬呀,我吔係part-time students咋,三 日內考兩科,其實連埋LCCI 3rd level我係一個禮拜考三科,你編到個考試咁鬼密,我想攞高分o的都難啦,你唔係要求我攞bare pass下話。Exam其實好淺,不過又唔知發乜嘢神經連條好simple嘅algebra都代錯哂,搞到又唔夠時間做,幾失望下。希望保到個A-啦。

LCCI exam:

• LEVEL 1---level 1其實都真係好易下, 加上YMCA Raymond Sir 同 Oscar Sir教得好好(在YMCA讀書時真係好開心,小班教學之餘,仲要o係total六個students中有五個係女仔,實在太幸福了),完全無壓力,結果 亦順利拎到個distinction,真係好多謝兩位阿蛇嘅悉心教導。

• LEVEL２-- -今次就俾Oscar Sir玩死,上堂時成日appreciate我吔讀完佢個course就可以出去考level 1 and 2,我就因為咁而high嘢。因為o個陣時仲要返工,所以臨考前四日至得閒去行書局睇下書,一去到就真係開心大發現喇,原來有四課書係完全無教過嘅,呢鋪 大檸樂喇。之後四日都仲要返工,剩餘時間著實不多,無可奈何之下,只有把心一橫skip咗o個四課唔讀,狂煲其餘十二課,求神拜佛千祈唔出o個四課。結 果,......,神捨棄了我,四條數中其中一條就係o個四課書入面嘅一課,仲要係四條做哂,無得揀o個隻,我o個廿五分就咁嘔番哂出嚟,欲哭無淚。不過 好在其餘三條都總算順利完成,不致於慘敗而回。結果,唉,bare pass only,雖然有少少遺憾,不過都好過肥咗要俾多次錢再考過啦。今次考試俾我嘅啟示就係,假如你想響公開試入面攞好成績,運氣係其中一個好重要嘅因素。

• Level 3---由於level 2考得唔好,加上又唔使返工,因此立下決心今次要 熟讀成個syllabus先至去考試。YMCA無開班,於是走咗去St. Perth讀。教我o個個阿Sir其實都幾犀利嚇,見佢響無model answer在手情況下,差唔多全部數可以balance到同揾到個answer。除咗話accounting o的數好掂之外,睇得出佢連taxation同business law方面都好有研究,真係好pro下。 不過,有次掛住同隔離個女仔傾偈,打斷咗佢講書,結果都俾佢省咗嘢,我諗佢都幾嬲下。考試方面其實出得好易,不過 我就幾失望,大部份嘅數都係level 1 and 2嘅程度,真係level 3嘅數數埋都唔知有無一條,完全嘥哂我辛苦溫書的心血。考試時坐我隔離左手面係一位潮人,只見佢又望下天,又 望下地,睇仲多過寫。我心諗,你不如番屋企瞓覺啦。果然,考咗兩粒鐘後,佢就交卷走人。其實佢都算幾有毅力o架啦,全程磨足兩粒鐘至走。右手面就更駭人, 一行連續十多個位都無人坐,枱上只有份question and answer books。我心諗,你吔班人認真富貴,交哂考試費都唔嚟坐陣,好唔俾面喎,雖然個冷氣大到好似個雪櫃咁,但係俾咁多錢都唔上嚟坐下,你吔都好大牌喎。 Result最快都要四月頭至知,今次我期望好大,如果無credit以上我會幾失望下。

05展望: 如無意外,今年應該可以完成個diploma,由於已經上到level 3,加上又開始要揾番份工幫補下,如果keep得番上年咁上下嘅成績,我都好滿意lu。目前最驚係taxation,auditing同 financial management,希望可以考好o的,俾我碌埋上degree啦。

04回憶錄

(一) 工作篇

終於都要同地鐵說再見,心裏總不是味兒。坦白說,雖然談不上是百分百之付出,但是,撫心自問,問心無愧,我所做的,過到自己,過到別人。兩年的時間,換來一場的笑話。

我不是甚麼天才,但請不要當我是蠢才。你食我夾棍,I don't care,反正我和你們根本就是兩類人。雖然我做不了岳飛,但我也懶得與你班大奸狗秦檜為伍。唔好話我清高,我只不想墮落。每天只懂搬弄是非,造謠生事。槍頭永遠是掉轉的,問你點死。

我的廢柴同事(排名不分先後):

同事一---個樣已經唔係好o架啦,仲要成日講大話,十句說話都唔知有無一句真。挑撥離間,無所不用其極。無事化小,小事化大,遲早俾人打鑊甘。

同事二---食o野唔做o野,做親o野永遠斤斤計較(感覺上你比我更適合做Accounting)。成日響度呻自己人工低,你係有料嘅咪出去搵過份囉,無人阻你發達o架。遲到早走係你嘅強項,返工吞pop瞓覺係你嘅嗜好。同你o的咁嘅人做同事,我自己都覺得羞恥。

同事三---老差骨,個個月政府有萬幾長糧,加埋份糧成三十K一個月,仲要係住公屋,唔怪得次次賭馬都成千上萬啦。不過呢o的o野都唔關我事,只不過,你次次賽馬日都迷失咗自己,成日唔見人,我好難向老細交代o架喎。

同事四---平時做事無乜o野,但一有o的事要make decision時,即刻騰哂雞,仲要交個波俾我。拜託你啦,成四十歲人啦,你食鹽仲多過我食飯啦,o的咁芝麻緑豆嘅小事都做唔掂,請你返嚟做乜o架?

同事五---真人版「拳霸」,睇少陣電視啫,唔使郁手打到人爆鼻呀。平時正正常常,發癲時三個人都噤唔住。都唔知老細係你貴親,郁手打人都唔使炒,同你做同事同綁住個計時炸彈有乜分別,點知幾時辣著你?

同事六---人工是我double,但cheap到連8250都偷。成日都係度怨天怨地,嫌三嫌四,覺得自已係大材小用,咁巴士閉咪鬼做囉,反正有你係度又唔見得幫到手。人稱閃閃仔,做o野永遠都閃閃避避,真係想問下你嘅嗜好係咪玩閃避球?

同事七---人工高過我嘅同事多的是,都唔明你點解會問我借錢。雖然唔使養屋企,但係我都要交學費o架(sorry,後尾我至知你係老破,不過你搵錯對象借錢,我自問無能為力,唔該你搵返你班黨友幫手)

附:我的無能上司(同樣排名不分先後)

上司甲-- -成日上網搵slogan,的確係好initiative,但係,唔該你manage下你隊team先啦,成鬼日一副愛理不理嘅樣,你知唔知你好鬼乞人 憎。作為department head,隊team唔掂你亦難辭其咎。你做o野真係好失敗,連班o靚成日剃你眼眉都唔知,賞罰又唔分明。你o的咁嘅人都有得留低,一係你後台好勁,唔係 就係老細盲咗。

上司乙---正經o野唔做,終日留連馬會網址賭馬賭波(不過都要多謝你,夾夾埋埋輸成十幾個飯盒俾我)。為人縮骨,成日揾班細嘅做擋箭牌。一毛不拔,兩年以來未請過我們食飯。你封利是我諗我一世都會記住。

上司丙---做o野算係三個之中最勤力的一個,不過對人要求不一。心情好時可以好好傾,心情壞時可以忽然鬧到你狗血淋頭。唔怪得你離過兩次婚啦,你老婆都頂你唔順呀。

有班咁嘅同事同上司,真係死而無憾!!

從未試過打咁大篇o野。

發洩完了,天氣涼,不及我心涼!

to be continued...