星期美點 WEEK 28(9/7 ~ 15/7)

• 送禮的budget原本是有限, 但是卻沒有睇中甚麼特別的禮物, 惟有選擇了over-budget的「交叉C」, 儘管我對Gigi沒有好感
• 以為街道的1號一定是在街頭或街尾的, 點知揾咗好耐都揾唔到, 認真失敗兼白痴, 結果走咗去食咖喱, 幸好啲嘢食都尚算OK
• 三個月的時間, 彼此間有著更深的瞭解, 讓我更懂珍惜一起渡過的每個晴天或陰天
• 突然發現有兩個男同事都係puma愛好者, 我應該加入「串燒三兄弟」的行列嗎?
  
• 11m加Pandev的一半所有權買比沙路, 雖然有點貴, 但總好過用安利了, 文生要好好珍惜
• 大衛維拿加盟華倫了, 加上P.K., 迪華奧同米斯達, 鋒線之強不下於任何強隊, 可以放棄哥拿迪了, 在新領隊科里斯帶領下, 希望可以重振雄風
  
• 不知不覺, 在公司已經呆了半年了, 坦白說, 真的沒有學過些甚麼, 離開是十分容易, 留底真的需要更多的勇氣
• 很難想像我會參與唱K這些有益身心的活動, 另一個得着是學會了玩骰盅, 雖然好耐無劈過酒, 都仲頂得兩下, 勁!!
  

星期美點 WEEK 27(2/7 ~ 8/7)

• 話咁快就第二十六個星期, 話都無咁快就過咗半年, 下半年一定要繼續努力
• 七一趕完一場成十二點幾先返到屋企, 跟著七二又返工返學, 七三再來一個朝九晚五式的遊船河, 多麼充實的生活, 羡慕呢!
• 七二F.M.assignment 都係剛剛做完, test又係無乜點溫過, 死亡機率高唱入雲, 懷著不安的心情踏上七三的船河
• 七三船河真係正到暈, 朝早九點集合都算啦, 一上船就俾啲咖喱汁整污糟條褲, 真係有種想跳落海的感覺
• 很enjoy在船上的每一分每一秒, 不論是在上層暴曬乾蒸, 還是在搏老命睇書做埋O.B.個assignment, 有聊得很
• O.B.的assignment實際做咗一日都唔夠, 會否延續上次的不幸呢?
• 終於找到Mr. Children的Sign了, 每日總要煲番幾次先夠皮, 實在是一流, 回想起《Orange Days》劇中一切令人感動的每個片段, 好歌不妨一聽再聽
  

星期美點 WEEK 26(25/6 ~ 1/7)

• 月尾的工作真的少得可憐, 日子真的十分難過, 完全無乜motivation返工
• F.M.下堂又要交assignment又要test, 做得呢樣又做唔到嗰樣, 更可能來個兩頭唔到岸, 兩敗俱傷, 玉石俱焚...
• 第一次搭西鐵, 比我想像中慢, 成半粒鐘先入到屯門, 失望
  
• 今年七一首次沒有去遊行, 在沒有選擇的情況下, 我穿著我的西裝褸, 踢著我的爛皮鞋, 出席公司的annual dinner, 有夠無聊
• 席間仲要成枱麻甩佬坐一枱, 旁邊的上海同事仲要不停煲煙, 兩個多小時可以點咗十幾支煙, 唔怪得之無乜胃口食嘢啦, 食二手煙都夠飽啦
• 七月唯一一日的公衆假期咁就過咗, 真係嬲到震
  
• 七一老媽問我點解執到咁正去遊行, 我答佢我係去interview無得去遊行, 佢又問我見乜鬼嘢工, 我話去黃金海岸in hotel management, 遲啲去迪士尼添, 佢又真係信我嗰嘢先夠抵死喎
• 雖然得番兩萬多人參與, 但那種七一精神卻沒有褪色, 仍在延續著五十萬人站出來爭取自由對抗強權的決心
  

星期美點 WEEK 25(18/6 ~ 24/6)

• O.B. test成績比預期中理想, 原來吹水神功並無失傳, 可幸可幸
• 上星期先test完下星期又要交功課, 九堂可以完成三個assignments及一個test, 趕到成隻狗咁, 其實當中又學過些甚麼呢?
  
• 上期exam result終於release, taxation(C)成績比想像中差, 莫非因 complaint而被blacklist, M.A.(B)則比預期理想, 方sir居功至偉, 有些後悔F.M. 沒有follow佢上
• 是上天開的玩笑, 還是妳要考驗我的忠誠? 兩個人一起的時間少了, 要開始重新適應一個人的生活
  
• 節衣縮食, 餐餐午餐乾啃麵包, 十分令人懷念的感覺, 就像回到中學生活的日子
• 七月要買禮物, 八月要交學費, 九月要交保費, 我想死, 想儲個錢真係好難
• 呢期聽番啲舊歌, 特別啱feel, 尤其是阿嶽首《雙手插口袋》, 貪佢夠串又中point