星期美點 WEEK 13(23/3 ~ 29/3)

• 玫瑰真的很頹, 一塊似樣少少的Prince tennis racquet都無, 想認真比較下都唔得, 無奈它賣費大哥的寶劍已是最平了($1,230), 送cheap cheap Prince線就當然不用客氣了, 加埋穿條靚靚地嘅K-GUT PRO 17, 盛惠$1,480, 不過穿線要等成個禮拜, 無得打住
  
  
• 華倫又神奇喎, 作客3-2掃低皇馬, 睇死佢時佢又威返次俾你睇, 全靠大簡幫了一把
  
• 人老了, 由上環行落銅鑼灣都覺得遠了, 行到灣仔都有點攰, 不足一小時的路程也如此辛苦, 未來要行的路又點算好?
• CWB Sogo原來比玫瑰更強勁, 好多舊到連上網都search唔到的tennis racquet都有得賣, 由千五減到五百多, 賣到原價三分一咋, 當然有無人去買或敢唔敢買就係亦一回事
  
• 中海油(883.HK)雖然去年實現油價上升及產量增長, 但所繳付的石油特別收益金急增72%, 達68.37億人民幣, 故去年盈利只微升1.1%, 至312.58億人民幣, 略高於預期。 中海油去年淨產量1.71億桶油當量, 增長2.6%, 油氣銷售收入730.37億人民幣, 增長7.7%, 主要受惠於高油價。 去年平均實現油價按年上升12.5%, 至每桶66.26美元, 但原油銷售量則按年下跌0.6%, 至1.346億桶。 去年天然氣平均實現價每千立方英呎為3.30美元, 按年增長8.7%, 天然氣總銷量增長16.1%, 至3,470萬桶油當量。 中海油去年底, 淨探明儲量26億桶油當量, 儲量替代率達142%, 去年產油氣田數量增至58個, 遍布中國海域。 去年桶油作業費為每桶油當量47.3人民幣, 上升11.8%, 其中中國海域桶油作業費為38.6人民幣, 上升11.4%。 董事長兼首席執行官傅成玉稱, 成本上升主要由於供應商服務及原材料價格持續上升, 未來難估計成本上升幅度, 因原材料持續高企, 通脹亦不可控制, 但將透過提升產量抵銷影響。 中海油今年初公布08年經營策略, 淨產量目標為1.95-1.99億桶油當量, 今年開發投資預計為41.5億美元。 傅成玉重申, 中海油回歸A股上市未有時間表, 一切視乎內地法規出台。 他又指出, 母公司在福建液化天然氣項目將於今年4月投產, 而上海及浙江項目則於09年才投產。 本社綜合證券商預測, 市場原先估計中海油去年盈利介乎264.72億-311.25億人民幣
  
  883舊年盈利同預期差不多, 如果唔係交暴利稅俾中央就更好, 未來油價日日升, 想低位入多手就完全是妄想了, 可唔可以落返$10樓下入俾我入多手呀?
  
  

星期美點 WEEK 12(16/3 ~ 22/3)

• 睇完《BC10000》, 係唔係真係有呢段歷史就無人知(九成九係假), 我只知道比張poster呃咗入場, 表面上係一場人獸大戰, 結果就係一場人類部落戰爭史, poster上面的劍齒虎出場時間加埋都唔知夠唔夠一分鐘, 故事平鋪直述, 難有驚喜, 結局又夾硬砌個good ending出來, 整體表現在我預期下限
• 上咗中山出job四day, 九點半在中港城搭船到中山港要個半小時, 加上到酒店安頓好, 到那邊公司已經是吃飯時間了, 比想像中更偏僻, 出入都無巴士, 連的士都無, 只能靠公司車出入, 非常不便
• 一到埗就發現部影印機壞咗, 要call人修理, 所有supporting document都不能copy, 事倍功半
• 星期二三早上果然停電了, 祖國的發電廠真不爭氣, 下午有返電先開到工, 基本上係又無咗一日做嘢
• 同事個旅行插蘇中咗壞埋, 焗住借我那個用, 結果自己又無notebook用, 加加埋埋都無一日係正正常常做到自己手頭上的工作
• 星期四朝早趕住盤點完, 下午兩點幾執好哂所有嘢鬆人, 剛好趕及三點船返香港, 去到中港城都五點了, 搭巴士返到屋企都差不多六點, 結果都係無得賺
• 四日晚餐都係間頹酒店裏食中餐, 唔係因為好食, 只因無其他選擇(四野都是荒地, 揾間食肆都無, 酒店內另一間咖啡廳晚上只有餐飲無食物), 中餐是普通的, 不算好食也不難食那種, 最難忘係嗌乜菜就無嗰種菜, 同事試過白菜, 菜心, 西洋菜, 結果只剩下跟其他餸伴碟的娃娃菜, 完全未試過咁普通的菜也欠奉, 同事無奈放棄, 點了三四個小菜, 埋單都唔使一百, 雖然唔貴, 但同一時間只見三數台客, 可見四處何等偏僻
  
• 返到酒店大家只有扭開個電視可做, 都睇到香港電視台嘅, 但係想上網就無地方上, 最抵死此刻正值台灣總統選舉, 一到新聞影到時就即刻cut咗播其他廣告, 唔到你唔服, 中共效率真係無得頂, 萬試萬靈
  

星期美點 WEEK 11(9/3 ~ 15/3)

• 國米2-0氣走Reggina, 結束三場聯賽不勝紀錄, 不過之後又再主場0-1輸俾利物浦在歐聯出局, 專心聯賽之餘, 文仙尼應否留任看來大有炒作, 假如物色到好人選的話, 我不介意另請高明
  
• 一百週年的慶典全家福, 這些年來我最喜愛的教練仍是古柏, 球員我會揀韋利, 甘比或J辛, 最痛恨的一定是反骨仔肥度了
• 去咗白蘆薈同黃小姐買notebook, 最後揀返toshiba M600, 雖然有得分24期月供, 不過竟然一份禮物都無得送, 極度失望, 個sales仲夠膽派咭片話下次幫襯一定送, 如果唔係趕時間裝機我一定同佢玩大佢
• 新出的firefox 3.0 beta出咗, 轉tab嗰下真係smooth好多, 但係好多extention都用唔到, 結果都係死死地氣down grade返落2.0算數
• 原本有另一同事上中山的job, 因為佢太忙而唔肯上(明眼人都知係假), 到我執佢二攤頂硬上, 暫定下星期上去stay四日, 仲要有兩日會停電未必做到嘢, 係就好玩囉
• 華倫主席蘇拿終於肯下台, 由佢贏西甲冠軍都炒賓帥就對佢無乜好感, 到今年又炒科里斯而跌至降班邊緣, 又同安古路, 艾比達同簡尼沙里斯撐到上court咁無面, 肯自動請辭都算係好事, 不過佢仍然係華倫最大股東, 話事權仍在手上, 只不過角色化作幕後垂簾聽政罷了
• 最近玩緊NDS一隻ARPG《Soma Bringer》, 玩法幾似PSO(不過當然是2D了), 有得執武器或換武器, 現在已衝上11lv, 已經有點吃力, 看來要再儲一下lv了
• 家裏來了兩個不速之客暫住幾天, 算起來是我的堂弟妺, 差啲俾佢地反轉成間屋, 好彩我就無乜嘢啱佢地玩, 安全過渡
• 試咗M記的Double足3両, 咬落真係啖啖肉, 成口都係牛, 完全試不出有其他味, 連我呢個牛魔王都差啲頂唔順, 成三十蚊一餐就唔使客氣了, 最費解係要等到晚上九點後至有得賣, 好食的話咪要晚晚九點至開餐?
  
  
• 差不多一年的新低了, 再跌的話要賭身家了, 大新加油咪衰啊!!
  

  13/03/2008

  買入

  大新銀行集團

  02356

  400

  $11.800

  $4,825.43

星期美點 WEEK 10(2/3 ~ 8/3)

• 近近地試咗SSP新開的心之拉麵, 新張期間有特價, $33一個拉麵加一個小食跟熱飲, 平過食味精拉麵了, 點了個豬軟骨拉麵, 拉麵湯底很清, 用料也很足, 有半隻蛋, 粟米, 紅蘿白絲, 紫菜, 魚蛋, 木耳絲等, 我就更喜愛跟餐小食辣味螺肉, 夠爽口, 餐飲轉了薄荷綠茶, 薄荷味極濃, 飲完勁醒神, 總括而言都好滿意
  
  
  這是Miss Wong的心之拉麵及薄荷奶茶(竟然飲奶茶??)
  
  
• 與黃小姐一齊睇notebook, 發現好多都極平, 又有啲身癢癢的, LG先過份, 有乜可能做到咁平, 頂爛市, 暫時幾鐘意部工人舍, 細細部又有touch screen好似幾好玩, 不過用Vista開機要成分幾鐘, 仲要八九千蚊, 係極大阻力
  
  
• 上星期出job上Shenzhen有得claim返錢了, 原來上去一日個daily allowance有$200喎, 夾夾埋埋袋返一千多落袋, 正!
• 篤數死定爆time cost死好, 不知道了, 反正都是死
• 俾個客玩死, 收收埋埋成大筆豪華renovation fee(點豪法? 平平地夠買個君滙港細單位)無入數, 原來因為同大判拆唔掂條數而鬧上court, time cost爆到我都無眼睇
• 今期又一傑作, 一日內完成一個case, 由planning到埋數到出report, 一手一腳一日內完成, 做完都不能不讃一下自己
• 這是舊公司附近買的一個煎雞扖烏冬, 最特別之處是那層雞皮有如食薯片一般脆口, 當然, 亦是非常的熱氣, 咁耐無食, 脆味依然