星期美點 WEEK 29(15/7 ~ 21/7)

• 小病初癒, 都只不過捱咗兩三日就好番唒, 比想像中快好多, 呢一年幾以來甚少運動反而無乜點病過, 真係幾奇怪下
• 好像今個星期才開始自己的假期, 在家裏上網, 打機, 瞓覺, 睇書, 全部都係一啲平時返開工無時間去做的一些事, 十分享受這段無拘無束的懶人生活
• 宜家先發現原來自己買咗好多game同書都無乜點掂過, 仲有套日劇《一公升的眼淚》都未睇哂, 希望呢個假期可以清理下呢堆被遺棄的寶物啦
  
• 平時又唔見掛黑雨喎, 點知我一唔使返工天文台就即刻整個黑雨贈慶, 不過好彩只係在深夜掛, 朝早已經除下了, 其實天文台用意可能同李生一樣, 叫大家勤力啲做事, 橫風橫雨都要照返工, 正!
• 睇咗《Cars》, 假如問我邊間公司整的卡通片令我有俾錢睇的意欲, 我可以答你一定係PIXAR, 製作人之認真絕非一般公司所能比擬, 呢間令Steve Jobs翻生的公司果然不同凡響, 多次的動畫製作都是是不可多得的佳品, 今次亦不例外, Lighting McQueen真的十分搶眼, 應該說是搶聽, Owen Wilson的配音真是一流, 表現十分稱職, 另Luigi同Guido兩個Ferrari fans講的意大利文(定係西班牙文?)都十分抵死, 假如睇港版配音的話就係你損失了, 片頭的一蚊雞劇場同片尾的過往PIXAR動畫人物客串登場亦十分有睇頭, 真係好少可以片尾播Credits時仍有大部分觀衆留低睇埋, 呢兩小時可謂十分抵睇, 真係要講多次:PIXAR, 你好嘢!
  
• 完成了NDS《Mario Kart》的50cc, 100cc, 150cc同mirror mode所有賽道, 去到後面啲賽道都幾難玩下, 除咗紅龜殼外, 後面啲車又成日出到藍龜殼, 一次玩下手中三四次龜殼, 對手又追得貼, 想攞第一少啲運氣都幾難
• 這個星期會出NDS《Touch! Bomberman Land》, 用支筆玩炸彈人會有乜特別唔同呢? 真係要玩過至知囉, 睇下個廣告先啦
  
  
• 好快書展又開幕了, 相信去的機會不大, 年年睇新聞見到都迫鑊甘, 仲叫我俾錢入去同人迫? 我就無咁多閒情逸致去貼錢買難受了, 經濟好返咁多, 捨得俾錢入場的人肯定多過上年, 入去同啲一年至買一次書的人爭, 使唔使呀?
  
• 其實我好佩服唐唐, 見到有盈餘之際仲整個GST出來俾大家歎, 仲叫大家唔好reject佢住, 要理性討論, 升斗市民人工加得少, 通脹週期又來了, 要接受5%的額外支出又談何容易, 人人剛剛先收完綠色炸彈, 大家諗住有退稅啦掛, 點知整件咁大嘅禮物, 想唔同你嘈都幾難, 未見其利, 先見其弊, 呢三百億的估計收入, 又有沒有計少了市民減少消費的意慾呢? 我覺得收入有成三百億未免太樂觀了 , 又即管睇下一衆支持街坊鄉里的DAB黨員會否敢同唐唐say no?
• 今期至愛係肉骨茶, 貪佢夠正直, 話之你係天皇老子, 過咗營業時間就明天請早啦, 腰骨伸到直一直, 勁!!