星期美點 WEEK 24(9/6 ~ 16/6)

• 出於對繁體字的堅持, 狠下心腸都係買咗《蘋果橘子經濟學》繁體版, 白白付多了七十元, 這個堅持有點貴, 不過都算值得
• 睇完第一章後真的大有收獲, 如果道德代表人們理想中的世界運作方式, 經濟學就代表真實的世界運作方式。理想同真實始終都係兩回事, 不能不讚嘆作者的精癖見解
  
• 買了namco出的DS「-右脳の達人- ガンバれっトレーナー」, 初初以為係新game來的, 後來先知原來已經出咗成個月喇, 太out了, 不過佢啲mini games都幾多, 希望會幾襟玩
  
• 對《The Omen》有點失望, 完全沒有令人覺得有咩咁恐怖, 既不是恐怖片, 卻打正恐怖片旗號在06-06-06上映, 片中的戴民雖然已經目無表情, 卻沒有帶出撤旦之子的震慄, 實在係致命傷, 故事之發展亦如一條直線, 平淡無奇, 只有一兩處地方配合音效輕輕的嚇你一嚇, 之後就差不多悶到瞓著, 絕對屬於雷聲大, 雨點少的代表作, 可能睇《海神號》仲好, 起碼都仲有啲潛水鏡頭睇下, 呢套就真係唔知有咩噱頭引人入場睇, 雖不至不知所謂, 但對我而言絕對係大失所望
  
  
• Germany 4 - 2 Costa Rica
  贏得有點吃力, 不過這是德國一貫風格, 有得贏已經相當俾面了, 費特列治的兩球包越位式的助攻俾雲祖柏是比賽亮點之一, 當然奇帥七情上面之表情亦值回票價, 估你唔到的是首名入球球員竟然係後衛拿姆, 無Ballack的德國可以踢到行雲流水咁流暢, 精彩!!
  
  
• Poland 0 - 2 Ecuador
  太夜開波無睇到, 不過肯定滿地眼鏡, 卮瓜多爾原來唔係門口狗, 出到歐洲都仲識踼波, 神奇, 最型都係佢地龍門囉, 油埋支國旗落塊面到, 搶鏡!!
  
• England 1 - 0 Paraguay
  英格蘭對對住巴拉圭都係食魚生粥, 仲要係靠對方擺烏龍添, 中前場完全無組織, 何來捧到咁熱? 不過都要祝賀下碧咸上半場三分鐘完成了世盃史上最快的鳥龍球, 又可名留青史啦, 幾好?
  
• United States 0 - 3 Czech Republic
  路斯基踢到曉飛咁, 入兩球之餘仲有球中柱, 差點兒帽子戲法, 不過最慘情係真高拿重戰之下傷埋, 連埋正選的巴路士下場齊齊避戰, 兵源捉襟見肘, 仲有兩場大戰點頂!!
  
• Australia 3 - 1 Japan
  由領先一比零之情況下(雖然入嗰球都有犯規之嫌), 捱到八十四分鐘, 諗住贏啦, 點知之後九分鐘內連失三球 , 真的十分失望, 之後仲有克羅羅地亞同巴西, 睇嚟都係踼完分組賽就拜拜!
  
• Brazil 1 - 0 Croatia
  巴西處子登場, 果然令人大失所望, 肥度跑唔郁時, 癲佬又失哂蹤添, 靠卡卡的一個入球小勝, 克羅地亞雖然輸咗, 不過亦踢得有板有眼, 次名出線應該有望
  
• Spain 4 - 0 Ukraine
  西班牙果然踢出氣勢大破烏克蘭, 拖利斯同韋拿點都好過老矣多多聲, 最估唔到係佩奧爾殺得性起走上去前一個扭你幾個助攻俾拖利斯窩利射入, 絕對係今屆世盃頭一輪比賽最精彩入球, 今年的西班牙實在強勁, 烏克蘭踢到唔願郁咁, 會唔會同天氣太熱有關, 舒夫真高的處子登場一定印象難忘, 可憐我件烏克蘭舒夫真高波衫就無面目着出街了
  
• Sweden 1 - 0 Paraguay
  瑞典要踢到八十九分鐘先由龍格保入一球, 肉酸情度不差於英格蘭, 兩場加埋只入一球, 鋒線之差無所遁形, 拿臣同伊巴睇到人眼冤, 無怪乎瑞典教練下半場一開始就換走後者了, 巴拉圭兩戰皆北, 無緣出線, 亦是意料之外, 兩場波一球都入唔到, 仲邊有面目留低呀?