星期美點 WEEK 25(17/6 ~ 23/6)

• Argentina 6 - 0 Serbia & Montenegro
  諗住塞黑last一屆踢世盃會摶下命啦, 點知仲食夠六隻光蛋添, 真羞家! 提早執包袱返歸了, 基士文完全唔係踢波, 老羞成怒, 抵你紅牌出場! 千呼萬喚始出來的美斯果然有啲料到, 一出場就有士哥, 成為阿隊世盃史上最年輕入球球員(18歲357日), 認真恭喜!! 最估唔到呢組所謂的死亡之組完全係無死亡戚脅, 阿根庭同荷蘭雙雙出線, 下場爭出線避葡萄牙啫!
  
  開創歷史的一球, 值得紀念
  
• Czech Republic 0 - 2 Ghana
  開賽不足兩分鐘就先失一球, 捷克陣腳大亂, 想攻咩? 偏偏又無咗一對正選前鋒, 加納班球員後生又夠氣夠力, 一兩個突擊分分鐘攞你命, 最致命的還有烏化奴斯的一張紅牌, 其實我覺得球證真係矯枉過正(就算replay播返都唔覺得有犯規), 註定捷克難以出線了, 十分可惜
  
  悲情的一刻......
  
• Italy 1 - 1 United States
  在基拿甸奴入波後的短短的五分鐘後就發生詭異的薩卡度OG事件, 一分鐘之後迪羅斯又鬆麥拜迪一肘(呢張紅牌完全夠咎自取, 批到麥拜迪滿面鮮血, 睇下fifa會唔會追加停賽場數??)提早返更衣室, 諗住美國人多蝦人少清況下, 馬斯度朗尼竟然臨完半場時又鏟派路後腳(估唔到球證真係夠薑一嘢開紅)變返十對十, 下半場一開始才七十秒樸比兩黃一紅(第二張黃牌絕對過嚴)變到九個打十個, 美國靠基拿左撲右撲先執返一分, 意大利打多人一個都入唔到波, 完全不知所謂, 三張紅牌係我睇咁耐世盃以來一場比賽所見最多紅牌的一場, 亦將E組推向死亡之組, 皆因踢完兩場之後, 數字上四隊都有機會出線, 惡搞
  
  睇多次都係睇唔明點入
  
  批肘? 可恨
  
• Japan 0 - 0 Croatia
  日本雖然頂得住克羅地亞各得一分, 不過卻是兩敗俱傷收場, 澳洲出線機會更大, 其實川口能活撲到斯拿球十二碼已經好嘢o架啦, 耐何鋒線不濟入唔到波啫, 寄望薛高怒宰巴西? 可能性微乎其微, 入到波已經偷笑啦!
  
  嘩! 最威水係今次啦
  
• France 1 - 1 Korea Republic
  法國和埋今場, 自九八年捧盃以來已經連續五場不勝兼只入得一球, 不知這又是否一項紀錄呢? 朴智星笠死巴夫斯的入球, 除咗鞏固己隊隊出線資格外, 還將法國踢入無盡的深淵中, 相信對於法國來說, 有機會成為連續兩屆分組賽出局的世盃冠軍, 肯定是一個國恥, 這個恥辱又會否取決於施丹兩黃停賽的不智上呢?
  
  巴夫斯似唔似打排球呢?
  
  差少少就係差少少
• Saudi Arabia 0 - 4 Ukraine
  首戰吞西班牙四蛋的烏克蘭, 今場發威炒返沙特四蛋, 真係要多謝沙特龍門薩依特, 第一球竟然俾人輕輕一點攻入大細龍門, 己經超高難度啦, 第二球列布夫三十碼外遠射自己又發軟蹄跌埋落地添, 比巴夫斯還要神, 相信唔係自己親眼所見, 都幾難以為自己睇緊世界盃呀? 或許沙特教練已經後悔唔用老將艾迪伊亞, 雖然佢踼三屆失咗廿五球咁多, 都唔好得去邊, 不過點都無呢位老友咁爆笑啦
  
  這個失球真係肉酸
• Sweden 2 - 2 England
  估唔到英格蘭可以頂得住瑞典, 除咗因為伊巴不濟外, 還有賴祖高爾的衝力射球, 呢組變成英格蘭首名, 瑞典次名出線十六強, 奧雲開波一分四十秒就自己扭傷右腳, 可以名正言順讓位俾朗尼, 艾歷臣唔使咁傷腦筋, 而且秘密武器禾確有望出場獻技, 絕對係好事
  
• Ivory Coast 3 - 2 Serbia & Montenegro
  由領先2:0到輸2:3, 第一次以塞黑名義, 亦是最後一屆參賽, 沒想到埋單總失球係十球, 雖然這場比賽勝負已經無關痛癢, 對曾經締造過華麗足球的南斯拉夫, 三戰皆北的收場, 莫不使人對這支黑馬唏噓不已, 科特迪瓦無咗杜奧巴反而嬴波, 可見無後者並非唔識踢波
  
• Czech Republic 0 - 2 Italy
  為甚麼出普勒而唔出加拉錫, 相信只有捷克教練布克拿知道, 但是這個匆忙的決定, 卻將整隊捷克都葬送出局, 普勒先是mark唔住馬達拉斯俾佢頂入第一球, 繼而唔收腳踢托迪領第二面黃牌出場, 相信布克拿對這個結果一定後悔不已, 一向支持捷克的我, 除了目定口呆之外, 還可以怎樣? 在這一組死亡之組內, 意大利加納雙雙晉級, 反而FIFA世界較高, 排名第二同第五的捷克同美國出局, 實在令人遺憾
  
  
  十分無不智的犯規, 換來......
  
  別了, 尼維特!
  
• Japan 1 - 4 Brazil
  日本落敗乃意料中事, 但係半場可以同巴西平分春色, 都算難能可貴了, 肥度入了世盃第十四球, 追平西德時代的梅拿入球紀錄, 打破紀錄指日可待, 估唔度肥度肥咗仲有兩度喎, 失敬失敬!
  
  你話梅拿定肥度邊個勁D吖啦!
• 終於都頂唔住辭了職, 工作量的確超出負荷, 離開未必一定係壞事, 最起碼世盃決賽唔使請假先