星期美點 WEEK 36(31/8 ~ 6/9)

• 為了綾瀨遙而走去《睇我的機械人女友》, 原來沒有失望, 綾瀨遙演的機械人女友確實精彩, 既有機械人剛強的一面, 亦有女友其柔弱的一面, 選角人抵讚, 結局的時空交錯有點混亂, 可以的話再睇多次會好些少, 整體來說已是水準以上之作
  
• 係咪笑料嚟?保特識踢波?
  牙買加足壇同樣在打著博爾特的主意，國家隊主帥西蒙斯表示自己正在「嚴肅」地考慮將博爾特與原世界紀錄保持者鮑威爾一同招入國家隊：「為此我會將陣型改為8-0-2。」
• 華倫 3-0 贏馬略卡, Vicente有士哥, 希望有個好開始
• 費大哥剛好在打風之前KO祖高域, 起碼比拿度/梅利的勝方多一天之休息時間, 第十三個Grand Slam在望
  
  忙裏偷閒買LV?
  
  
• 好快有Google chrome用, 希望會進一步推動瀏覽器市場的發展, FF在這方面發展得不錯, Google想再分一杯羮要加倍努力才行
  
  
• 紅到上版, 意料之外, 大婆台啲偽人可以laid off
  陳恩能、石金華《明報》專訪
  Maple | 5th Sep 2008, 23:07 | 報刊摘要 | (600 Reads)
  
  丹尼爾石仔搞gag當紅　評述奧運變棟篤笑
  網民開fans club　人數一週達2500　3/9/2008
  
  
  （按：照片與聲音給人的印象竟然剛剛相反！左邊陳恩能的聲線穩重，右邊石金華的聲音很年輕佻皮，叫「石仔」也不突兀。）
  
  【明報】奧運期間，場上健兒來自世界各地，錄影廠內的主持人、評述員亦來自五湖四海，當中有人被狠批奧運知識貧乏兼曬命，然後回應「叫網民返屋企啦」；亦有人早在三四年前已開始準備，結果以專業的表現及對體育的認識贏得網民好評。
  
  明珠台的粵語評述陳恩能和石金華，既無港姐的美貌，亦自認沒有徐嘉樂專業。但有網民率先在blog內細心記錄二人200條搞笑金句；有人於facebook成立他們的fans club，一週內人數突破2500，在網民當道的新世代中，他們紅了。
  
  堅稱事前無度gag　臨時自由發揮
  
  陳恩能（丹尼爾）和石金華（石仔）堅稱，事前沒有度過任何gag﹕「就係因為冇度過，所以估唔到有咁好反應。明珠台都唔知我地係咁0既人。」以往石仔講波都是一本正經，今次改變路線，他說原因是「乜都冇」﹕「今次奧運大部分資源去左翡翠台和北京，明珠台完全無定路線，有聲就算。不過有聲都要有野講。第一日直播，連出場名單都冇！」資源不足反而讓二人自由發揮﹕「係明珠台冇得出鏡，會free尐，可以亂來。」
  
  直播時笑到「捐」入檯底　熄咪10秒
  
  奧運期間，石仔每日評述13小時，丹尼爾則上午返工，下午和晚上評述9小時，有時加上翁金驊及黃興桂。要他們數評述過什麼冷門項目，他們數了一輪手指﹕「係得乒乓未講過……」讀著40多頁的金句讀得出神，兩人說﹕「自己睇返4、5次都覺得好好笑。」二人在直播室，一樣日日都笑到人仰馬翻。石仔說﹕「我通常笑到『捐』入檯底，佢就比較忍得，深呼吸定一定神就再講過。有時一個頂住，另一個出去笑住先。」丹尼爾補充﹕「如果真係唔掂，就會熄左支咪大笑10秒先至開返咪。」
  
  難忘亂評激流獨木舟　扯到雙城記
  
  石仔憶述最難忘的大笑經驗﹕「有一次直播激流獨木舟，個畫面係直升機係上空影住個水上公園成5分鐘，於是我地就亂講，由水流方向講到世界上仲有無呢類水上公園，再講布達佩斯其實係兩個城市，講到去分開布達同佩斯條河係萊茵河，最後講到雙城記。點知第二日突然捉左我去高清台評述，當時桂神（黃興桂）已經坐係度。我一坐低佢遞張紙埋黎，上面寫住布達佩斯條河係多瑙河，我地即刻笑到出唔到聲，我趕左桂神出去，因為我見到佢笑我都收唔到聲，結果佢笑左5分鐘先返入黎。」丹尼爾插嘴﹕「桂神既笑聲唔係哈哈大笑，係『kit kit'聲，我地好多時笑都係因為佢既笑聲。」如此過癮的節目風格，監製可有異議？「唔會，因為監製自己都笑緊。」
  
  丹尼爾否認自己騎呢﹕ 「因為我唔想做騎呢怪。但我平時都鍾意搞gag，即係有乜野都會兜個圈講。但我唔鍾意『搞爛gag'呢個term囉，咩叫爛gag先？」石仔開始為自己的 gag辯護﹕「好似呢句拿度食緊大蕉，我講埋大蕉有一個重要功用係通便。我識一個長者一日唔食大蕉就去唔到（廁所），呢個係中國人的常識！」
  
  作為年輕人，丹尼爾當然知道自己的gag受歡迎，但他說﹕「我依然係評述第一，搞gag第二，唔會過火。做評述最緊要知道自己定位。徐嘉樂係香港籃球隊和排球隊代表，我地永遠做唔到徐嘉樂。但係我地可以以體育迷的身份，陪大家一齊睇比賽。奧運同足球唔同，大部分觀眾對好多賽事都唔太認識，我地運用本身的體育觸覺，以輕鬆手法帶大家一齊睇。」
  
  誰說他們不專業？石仔有多年執教足球隊經驗，採訪過多屆奧運及亞運，丹尼爾自2000年起主持體育節目，曾評述足球、冰球、單車、賽車等比賽。雖然今次奧運有不少冷門賽事，但累積下來的體育觸覺大派用場﹕「比賽前我地會做功課，瞭解賽事規則同選手背景。講技術分析就好難扮專家，但起碼知道擲鐵餅講離心力，射擊睇選手的精神面貌。」
  
  「只顧搞笑無體育知識就唔好」
  
  丹尼爾還是說﹕「大家喜歡我地搞gag當然開心，但如果大家覺得我地評述得好就仲好開心，我唔係出黎搞gag嘛。」
  
  上星期六明珠台直播金牌選手來港獻技，孖寶因此重組，他們都認為跟自己受歡迎有關﹕「有時本來7點收工，要我OT到11點，我估收視應該有上升。」問他們是否認為對方是最佳拍檔？二人相視而笑，石仔先開腔﹕「我希望將來係！」丹尼爾立即接話﹕「今次真係0岩0岩遇著剛剛，一個鍾意搞gag另外一個又接到。我希望將來可以繼續合作！」